കോതമംഗലത്തെ വിദ്യാഭ്യാസ തലസ്ഥാനമാക്കിയ പ്രധാനി; ഗ്രാമങ്ങളിൽ വൈദ്യുതിയും, ജല സേചന പദ്ധതികളും നടപ്പിലാക്കിയ സാമാജികൻ

കോതമംഗലം : കേരളാ നിയമസഭ കണ്ട എക്കാലത്തെയും മികച്ച നിയമസഭാ സാമാജികൻ. കോതമംഗലത്തിന്റെ ഗ്രാമങ്ങളിൽ വൈദ്യുതിയും, ജല സേചന പദ്ധതികളും നടപ്പിലാക്കിയ ദീർഘ വീക്ഷണമുള്ള സാമാജികൻ വിടവാങ്ങിയിട്ട് 7 വർഷം ( 16.9.1950 – 30.10.2011 ) . മികച്ച ഭരണാധികാരി , സംഘാടകൻ , വാഗ്മി എന്നീ നിലകളിലും ശോഭിച്ച വ്യക്തിത്വം. കേരളത്തിന്റെ അഭിമാന നേട്ടങ്ങളായ നെടുമ്പാശ്ശേരി അന്താരാഷ്ട്ര വിമാനത്താവളം , കലൂർ അന്താരാഷ്ട്ര സ്റ്റേഡിയം എന്നിവ യാഥാർഥ്യമാക്കുവാൻ അന്നത്തെ മുഖ്യമന്ത്രി ശ്രീ കെ കരുണാകരന്റെ മുഖ്യസഹായിയായി വർത്തിച്ച മന്ത്രി .

മന്ത്രിയായിരിക്കെ താൻ നടപ്പിലാക്കിയ ഭരണപരിഷ്കാരങ്ങളെ പല്ലും നഖവും ഉപയോഗിച്ച് എതിർത്തവർക്കുപോലും പിന്നീട് ടി എം ജേക്കബ് ചെയ്തതായിരുന്നു ശരി എന്ന് സമ്മതിക്കേണ്ടി വന്നത് ചരിത്രം. 1986 യിൽ കോളേജുകളിൽ നിന്ന് പ്രീ ഡിഗ്രി ഒഴുവാക്കി പ്ലസ് ടു കോഴ്‌സ് തുടങ്ങുവാൻ കാണിച്ച ആർജ്ജവം. കോതമംഗലം മണ്ഡലം കൈവെള്ള പോലെ സുപരിചിതനായ വ്യക്തി . മണ്ഡലത്തിലെ ഗ്രാമങ്ങളിലെ വീടുകളിൽ വൈദ്യുതി എത്തിക്കുവാൻ കഠിനമായി പരിശ്രമിച്ചു വിജയം കണ്ട കർമ്മ ധീരൻ. പെരിയാർ വാലി ജലസേചന പദ്ധതിയിൽ കാട ഇറിഗേഷൻ പ്രൊജക്റ്റ് കൂടി ഉൾപ്പെടുത്തി കൃഷിക്കാർക്ക് ആശ്വാസമായ കർഷക സ്‌നേഹി. മാതിരപ്പിള്ളി സ്കൂളിൽ തൊഴിൽ അധിഷ്ഠിത ഹയർ സെക്കന്ററി കോഴ്‌സ് അനുവദിച്ചു കൊണ്ട് കോതമംഗലത്തെ വിദ്യാഭാസ മേഖലയിലുള്ള മുന്നേറ്റത്തിന് ഇന്ധനം പകർന്ന വിജ്ഞാനി. അങ്ങനെ നിരവധി വിശേഷണങ്ങൾക്ക് യോഗ്യനായ വ്യക്തികൂടിയാണ് ടി എം ജേക്കബ്.

1950 സെപ്റ്റംബർ 16 നു കൂത്താട്ടുകുളത്തിനടുത്ത് വാളിയപാടം താന്നികുന്നേൽ ടി എസ് മാത്യുവിന്റെയും അന്നമ്മയുടെയും പുത്രനായി ജനനം . ഒൻപതു തവണ നിയമസഭയിലേക്ക് മത്സരിച്ചതിൽ എട്ടുതവണയും വിജയിച്ചു . ( 1977, 80, 82, 87, 91, 96, 2001, 2011 ). 1980, 82, 87 വർഷങ്ങളിൽ കോതമംഗലത്തു നിന്നുമാണ് തിരഞ്ഞെടുക്കപ്പെട്ടത് . മറ്റു വർഷങ്ങളിൽ പിറവത്തുനിന്നും 2006 ൽ പിറവത്ത് ശ്രീ. എം ജെ ജേക്കബിനോട് പരാജയപ്പെട്ടു. 2011 ൽ എം ജെ ജേക്കബിനെ പരാജയപ്പെടുത്തി വീണ്ടും നിയമസഭയിലേക്ക്.

1977 ൽ ആദ്യമായി പിറവത്തുനിന്നും നിയമസഭയിലേക്ക് തിരഞ്ഞെടുക്കപ്പെടുമ്പോൾ പ്രായം 26 വയസ്. അഞ്ചു തവണ സംസ്ഥാന മന്ത്രിയായി സത്യപ്രതിജ്ഞ ചെയ്തു . 1982 ൽ ആദ്യമായി മന്ത്രിയാകുമ്പോൾ പ്രായം 32 വയസ് തികഞ്ഞിരുന്നില്ല . 24.5.1982 മുതൽ 25.3.1987 വരെ കെ കരുണാകരൻ മന്ത്രി സഭയിൽ വിദ്യാഭ്യാസവകുപ്പ് മന്ത്രി. 29.6.1991 മുതൽ 16.3.1995 വരെ കെ കരുണാകരൻ മന്ത്രി സഭയിൽ ജലസേചന – സാംസ്‌കാരിക വകുപ്പ് മന്ത്രി. 22.3.1995 മുതൽ 9.5.1996 വരെ എ കെ ആന്റണി മന്ത്രിസഭയിൽ ജലസേചന – സാംസ്‌കാരിക വകുപ്പ് മന്ത്രി.17.5.2001 മുതൽ 29.8.2004 വരെ എ കെ ആന്റണി മന്ത്രി സഭയിൽ ജലവിഭവ വകുപ്പ് മന്ത്രി. 18.5.2011 മുതൽ ഉമ്മൻ ചാണ്ടി മന്ത്രി സഭയിൽ ഭക്ഷ്യ – സിവിൽ സപ്ലൈസ് , രെജിസ്ട്രേഷൻ വകുപ്പ് മന്ത്രി ആയിരിക്കെ 30.10.2011 നു ആകസ്മിക വേർപാട് . ഫിസിക്സിൽ ബിരുദവും നിയമത്തിൽ ബിരുദാനന്തര ബിരുദവും നേടിയിരുന്ന ടി എം ജേക്കബ് എന്റെ ചൈന പര്യടനം ( മലയാളം ) My China Dairy ( English ) എന്നീ പുസ്തകങ്ങളും എഴുതിയിട്ടുണ്ട് . ഭാര്യ : ആനി ജേക്കബ് ( ഡെയ്‌സി ) മക്കൾ : അനൂപ് ജേക്കബ് MLA , അമ്പിളി ജേക്കബ്.

Be the first to comment

Leave a Reply

Your email address will not be published.


*